Metastasia nola osatu ahal daiteke?

Metastasia, gantzen metabolismoari lotuta

Tumoreen metastasiak gantzen metabolismoarekin zerikusia duela argitu du Bartzelonako ikerketa talde batek. Ikertzaileen arabera, minbizi zelulen ehuneko oso txiki batek baino ez du metastasia sortzeko ahalmena: % 1-% 5ek baino ez. Bada, orain jakin dutenez, haientzat gantza ezinbestekoa da.

Bartzelonako Ikerketa Biomedikorako Institutuan egin dute ikerketa, eta han argitu dute metastasia eragiteko ahalmena duten zeluletan besteetan baino askoz ere gehiago espresatzen dela CD36 izeneko genea. Gene horrek kontrolatzen duen proteina gantz-azidoen errezeptore bat da; horrek erakusten du lotura zuzena dagoela gantzen eta metastasiaren artean. 

Bestalde, proteinak metastasiarekin duen erlazioa ere garbia dela frogatu dute, saguetan egindako esperimentuetan: tumoreari CD36 genea gehituz gero, gaiztoa bihurtzen da eta metastasia eragiten du; aldiz, inhibituz gero, metastasia ia desagertu egiten da.

Hori ikusita, ikertzaileak minbizi gaiztoak tratatzeko bide berri bat probatzen ari dira, CD36 genea blokeatzean oinarrituta. Britainia Handiko MRC Technology konpainiarekin batera hasi dira probak egiten, eta, dena ondo bidean, 5-10 urte barru CD36 genea blokeatzen duten antigorputzak prest izatea espero dute.

Iturria: http://zientzia.eus/artikuluak/minbizien-metastasia-gantzen-metabolismoari-lotuta/